16 yeni hörümçək növü kəşf edildi | Çində hər kəsi təəccübləndirən addım

Çinin Tunjen Universitetinin professoru Mi Syaotsi 16 yeni hörümçək növü kəşf edib.

Maraqlısı budur ki, o, hörümçəklərə mahnı adları qoyub.

Belə ki, professor tayvanlı müğənni Cey Çounun fanatıdır və tapıntılarında onun mahnılarını yaşadacaq.

Hörümçəklərdən birinin adı “Ulduz ovqatı”dır. Buna səbəb adıçıkilən müğənninin 2000-ci ildə çıxan albomundakı “Starry Mood” mahnısıdır. “Bağışla hörümçək” adını alan da olub.

Ən maraq doğuran isə “Gizli kod” adlandırılan hörümçəkdir. Çünki o sarı-qəhvəyi rəngi və nazik torları ilə seçilir.

Professorun hörümçəklərə mahnı adları verməsinin digər səbəbi bu canlılara qarşı insanlar arasında maraq oyatmaqdır. Onun təbirincə desək, “ümid edirəm ki, bu, elm və ekologiyaya diqqəti artırar”.

Professorun Çinin Weibo platformasındakı paylaşımı 26 milyon insan tərəfindən izlənilib.

Qeyd edək ki, Mandopop kralı adlandırılan Cey Çou təkcə bioloqlar yox, astronomları da ruhlandırıb. Bu səbəbdən tayvanlı astronomlar asteroidlərdən birinə onun adını veriblər.