2022-2024-cü illərdə 183,58 milyard dollar ayrılıb

Vaşinqtonun Kiyevə verdiyi hərbi və maliyyə dəstəyinin real miqyası rəsmən açıqlanıb. Baku TV-nin "Dünya" xəbərlərində ABŞ-ın rəsmi hesabatlarına istinadən verilən məlumata görə, 2022-ci ildən 2024-cü ilin sonuna qədər olan dövrdə Ukraynaya ümumilikdə 183,58 milyard dollar vəsait ayrılıb. Bu rəqəm müasir tarixdə bir dövlətin digərinə qısa müddət ərzində göstərdiyi ən böyük hərbi-maliyyə yardımı kimi qeydə alınıb.

Hesabatda qeyd olunur ki, bu vəsaitin böyük hissəsi birbaşa hərbi texnika, silah-sursat tədarükünə və Ukrayna ordusunun döyüş hazırlığının artırılmasına sərf edilib. Digər bir hissə isə ölkənin iqtisadi sabitliyini qorumaq və humanitar ehtiyacları qarşılamaq üçün ayrılıb. Pentaqonun məlumatına görə, yardım paketlərinə "Patriot" hava hücumundan müdafiə sistemləri, "Abrams" tankları və uzaq mənzilli raket kompleksləri daxildir. Videoda bu nəhəng məbləğin ABŞ daxili siyasətində yaratdığı müzakirələr, 2026-cı il üçün yardım perspektivləri və bu vəsaitin cəbhədəki hərbi balansına təsiri barədə ətraflı analiz təqdim olunur.