380 milyon il yaşı olan tarixi qalığın aqibəti | Professor onları məhkəməyə verdi

ABŞ-nin UPS çatdırılma xidməti ödəniş etməyən Nyu-Cersi universitetinin səhlənkarlığı səbəbindən 380 milyon il yaşı olan daşlaşmış qalıqları zibilliyə atıb.

Bildirilir ki, hadisə ilə əlaqədar ətraf mühit elmləri professoru və paleontoloq Martin Bekker universiteti məhkəməyə verib.

İddiaya görə, amerikalı professor həmkarı ilə birlikdə Devon dövrünə aid dəniz onurğasızlarının daşlaşmış qalıqlarından ibarət kolleksiyaya həsr olunmuş monoqrafiya yazmağı planlaşdırıb.

2024-cü il iyunun 20-də Bekker təxminən 200 daşlaşmış qalığı 19 ayrı qutuda qablaşdırıb ki, kolleksiyanı Floridadakı həmkarına göndərsin. Həmin gün bağlamalar universitetin poçt şöbəsinə çatdırılıb.

Çatdırılma üzrə ixtisaslaşan UPS şirkəti bağlamaları götürüb, lakin bir neçə gün sonra professorun həmkarları ona qalıqların çatdırılmadığını bildiriblər. Məlum olub ki, bağlamalar Tennessi ştatının Neşvil şəhərinin ətrafında müəyyən edilməmiş bir zibilliyə atılıb.