43 cildlik nəşrdə 60 mindən çox ekspert və alim iştirak edib

Çin Ensiklopediyasının üçüncü nəşri həm çap, həm də onlayn formatda təqdim olunub.

1978-ci ildən bəri inkişaf edən bu ensiklopediya Çin Nəşriyyat Qrupu tərəfindən nəşr olunur və ölkənin ən nüfuzlu müasir məlumat mənbəyi sayılır.

Bu nəşrdə 60 000-dən çox ekspert və alim iştirak edib. Çap versiyası 43 cilddən ibarətdir, onlayn versiyada isə 2025-ci ilin sonuna 519 000-dən çox məqalə yerləşdirilib. Onlayn platformaya üstünlük verilməsi informasiya əldə etməyi daha sürətli və əlçatan edir.

Ekspertlər bu ensiklopediyanın həm ənənəvi, həm də rəqəmsal formatda inkişafının elm və təhsildə əhəmiyyətini vurğulayırlar. İnsanların bilik əldə etmə vərdişlərinin dəyişdiyi bir dövrdə belə geniş və zəngin mənbənin mövcudluğu böyük əhəmiyyət kəsb edir.

Çin Ensiklopediyası həm alimlər, həm də geniş oxucu kütləsi üçün etibarlı və zəngin məlumat mənbəyi olaraq qalır. Onlayn versiyanın sürətlə genişlənməsi, süni intellekt və digər texnoloji yeniliklərlə inteqrasiyası gələcəkdə ensiklopediyanın daha da inkişafına zəmin yaradır.