96-cı “Oskar” mükafatının qalibləri məlum oldu

Hər il kino sahəsində ən yaxşıların seçildiyi “Oskar” mükafatlarının təqdimetmə mərasimi baş tutub.

96-cı dəfə təşkil edilən mötəbər tədbir ABŞ-nin Los Anceles şəhərindəki "Hollivud bulvarı" adlandırılan “Dolby” teatrında keçirilib. Mərasimdə 10 ekran işi “Ən yaxşı film” nominasiyası uğrunda mübarizə aparıb.

“Oppenhaymer” ekran işi “İlin ən yaxşı filmi” nominasiyası üzrə “Oskar” mükafatını qazanıb. “Ən yaxşı aktrisa” “Kasıblar və bədbəxtlər” filmində oynadığı roluna görə Emma Stoun, “Ən yaxşı aktyor” isə “Oppenhaymer”in baş qəhrəmanı Killian Mörfi seçilib.

“Barbi” filmində səslənən “Mən nə üçün yaradılmışam?” mahnısı “Ən yaxşı mahnı”, “Oppenhaymer” filminin musiqisi isə “Ən yaxşı musiqi” nominasiyalarında “Oskar”a layiq görülüb.

Bundan əlavə, “Ən yaxşı ikinci plan aktyoru və aktrisası” nominasiyalarının qalibləri Robert Dauni və Davayn Coy Randolf olub. “Ən yaxşı xarici film mükafatı” "Maraq zonası", “Ən yaxşı uyğunlaşdırılmış ssenari” isə "Amerika fantastikası" filminə verilib. "Düşmə Anatomiyası" ekran işi də ən yaxşı orijinal film ssenarisi adını qazanıb.

Yaponiya istehsalı olan "Oğlan və quş" “Ən yaxşı animasiya filmi", "Mariupolda 20 gün" “Ən yaxşı sənədli film”, "Henri Şuqarın ecazkar hekayəsi" "Ən yaxşı qısametrajlı bədii film" olub. "Müharibə bitdi! Con və Yoko musiqidən ilhamlanıb" isə "Ən yaxşı qısametrajlı animasiya filmi" seçilib.