Abbas Ərağçi etirazların nəzarət altına alındığını bildirib - Baku TV

"Biz müharibə istəmirik, amma buna tam hazırıq. Eyni zamanda, dəfələrlə qeyd etdiyim kimi, biz danışıqlara da hazırıq. Etirazçılar arasında silahlılar da olub, onlar təkcə təhlükəsizlik qüvvələrimizə, polisə deyil, həm də biz gördük ki, adi insanlara da atəş açırlar".

Bunu İranın xarici işlər naziri Abbas Ərağçi bildirib. O, etirazların dinc xarakter daşıdığını və hakimiyyətin dərhal iqtisadi problemlərin həll yolunu tapmaq üçün iş adamları və digər maraqlı tərəflərlə danışıqlara başladığını deyib. Nazir əlavə edib ki, lakin sonra terrorçu qruplar etirazçılara qoşulub.

Ərağçinin sözlərinə görə, ölkədəki vəziyyət tam nəzarət altındadır: "ABŞ Prezidenti cənab Tramp demişdi ki, əgər insanlar öldürülərsə, biz gəlib müdaxilə edəcəyik. Amma vacib olan o idi ki, Trampın şərhlərinə görə xaos yaratmaq istəyənlər ABŞ-ni müdaxiləyə cəlb etmək ümidi ilə ölənlərin sayını artırmağa çalışdılar.10 yanvardan bu günə qədər vəziyyətin nəzarət altına alındığı növbəti mərhələdəyik. Düşünürəm ki, internet tam təhlükəsizlik nəzarəti qurulduqdan sonra tezliklə yenidən açılacaq".

Məlumatlara görə, İran rialının kəskin devalvasiyası fonunda başlayan etiraz aksiyalarında bu günədək 500-dən çox insan ölüb.