Abbas Əraqçi Rusiyaya səfər etdi: Putinlə görüş olacaq?

İranın ali lideri Ayətullah Əli Xameneinin Rusiya Prezidenti Vladimir Putinə müraciəti dünyada baş verən son hadisələrə, eləcə də Moskva ilə Tehran arasında münasibətlərin inkişafına həsr olunub.

Bu barədə İranın xarici işlər naziri Abbas Əraqçi Moskvada jurnalistlərə açıqlamasında deyib.

“Bu müraciət son mühüm dünya hadisələrini, regionda baş verən hadisələri, eləcə də ikitərəfli münasibətlərə dair məsələləri əhatə edir”, – deyə iranlı nazir qeyd edib.

Qeyd edək ki, İran XİN başçısı Abbas Əraqçi Moskvada səfərdədir və o, səfər çərçivəsində Prezident V.Putinlə görüşəcək.

Səfər haqqında məlumat verən Rusiya Xarici İşlər Nazirliyinin rəsmi nümayəndəsi Mariya Zaxarova deyib ki, tərəflər Moskvada keçirilən görüşdə Suriya, Cənubi Qafqaz və Xəzərdəki vəziyyəti müzakirə edəcəklər. Nazirlər regional məsələlərlə yanaşı, İranın nüvə proqramı üzrə Birgə Hərtərəfli Fəaliyyət Planı ətrafında vəziyyət barədə də ətraflı fikir mübadiləsi aparacaqlar.