Abbas Əraqçi: “Xameneinin iqamətgahı vurulan zaman mən də orada idim”

İranın sabiq ali rəhbəri Ayətullah Seyid Əli Xameneinin ofisi bombalanan zaman xarici işlər naziri Abbas Əraqçi də orada olub.

Bu barədə o özü “Al Mayadeen”ə müsahibəsində bildirib.

Əraqçinin sözlərinə görə, həmin gün Cenevrədə keçirilən danışıqlar barədə məruzəni ali rəhbərə təqdim etmək üçün iqamətgaha yollanıb.

“Dağıntıların altından çıxarkən bütün düşüncəm ona hücum edilib-edilmədiyindən ibarət idi. Rəhbərin şəhid olma xəbəri yayılana qədər – müharibənin ilk iki günü onun başına nə gəldiyi ilə bağlı həddindən artıq narahat idim”, – deyə Əraqçi qeyd edib.

Diplomat Xameneinin ölümünün İranın tarixində dönüş nöqtəsi olduğunu və bu nöqtənin İranın gücünü bütün dünyaya nümayiş etdirdiyini vurğulayıb.

O, yeni ali rəhbərin – Ayətullah Seyid Müctəba Xameneinin seçilməsinə diqqət çəkərək, İran İslam Respublikasındakı sistemin ayrı-ayrı şəxslərdən asılı olmayacaq qədər güclü olduğunu bildirib.