"Onun əlindən tutub irəlilədim" | Əraqçi ABŞ-nin hücumundan necə xilas olduğunu danışdı - Baku TV

İranın xarici işlər naziri Abbas Əraqçi ABŞ və İsrailin hücumları zamanı yaşadıqlarından danışıb.

Əraqçi hücumun baş verdiyi səhər mərhum ali rəhbər Əli Xameneinin baş katibinin müavini Hicaziyə məlumat verdiyini bildirib.

Onun sözlərinə görə, bina bir neçə saniyə ərzində ard-arda üç partlayışla silkələnib.

“Üçüncü partlayışdan sonra tavan, divarlar, hər şey üzərimizə çökdü. Hicazinin əlindən tutdum və dağıntılar arasından irəliləməyə çalışdıq”, – deyə Əraqçi bildirib.

İranlı nazir qeyd edib ki, düşmən rəhbər heyəti hədəfə alaraq ölkəni iflic edəcəyini düşünüb, lakin buna nail ola bilməyib. Əraqçi həmçinin rəsmi avtomobilinin də vurulduğunu, Xarici İşlər Nazirliyinə isə yoldan keçən bir nəfərin köməyi ilə çatdığını deyib.

Xatırladaq ki, bundan əvvəl Abbas Əraqçi müharibədən əvvəl bütün mümkün ssenarilər, o cümlədən ölkənin ali liderinin öldürülməsi ehtimalının belə ən yüksək səviyyədə nəzərdən keçirildiyini bildirmişdi.

Onun sözlərinə görə, bu ehtimal üçün də əvvəlcədən xüsusi fəaliyyət planı hazırlanıb və buna görə də hər hansı böhranlı vəziyyət baş verəcəyi təqdirdə İran rəhbərliyi dərhal reaksiya verməyə tam hazır olub.

“Bütün ssenarilər müharibədən əvvəl nəzərdən keçirildi. Hətta liderin öldürüləcəyi təqdirdə nə edəcəyimiz barədə planımız var idi. Buna görə də heç təəccüblənmədik və hər şeyə hazır idik”, – deyə Əraqçi qeyd edib.

İranın xarici işlər naziri əlavə edib ki, Ali Milli Təhlükəsizlik Şurasının iclaslarında ali liderin öldürülməsi ehtimalını birbaşa ifadə etmək çətin olduğundan bunun üçün məxfi “110 kodu”ndan istifadə olunub. İclas iştirakçılarının hamısı isə bu şifrənin hansı mənanı kəsb etdiyini çox yaxşı biliblər.