ABŞ 100-ə yaxın iranlını deportasiya edib

ABŞ Administrasiyası sentyabrın 29-u təxminən 100 iranlını ölkədən deportasiya edib.

Bu barədə “The New York Times” məlumat yayıb.

Bildirilib ki, deportasiya edilənlər arasında sığınacaq verilməsindən imtina olunmuş kişilər və qadınlar olub. Onların bir qismi həbs olunduqdan sonra könüllü deportasiyanı qəbul edib. Luizianadan havaya qalxan xüsusi təyyarə Qətər üzərindən İrana yola salınıb.

Qeyd edək ki, bu, son illərdə iranlıların ABŞ-dən ən böyük kütləvi deportasiyası kimi qiymətləndirilir. Bu insanlardan bəzilərinin İranda edam ediləcəyi vurğulanıb.

BMT Baş Assambleyasında Donald Tramp vurğulayıb ki, Birləşmiş Ştatlar miqrantları kütləvi surətdə deportasiya etmək üçün səylərini ikiqat artıracaq. D.Tramp Administrasiyası miqrantları istənilən vasitə ilə deportasiya etməkdə qərarlıdır.

Qeyd edilib ki, deportasiya ABŞ və İran arasında pərdəarxası aparılan danışıqlar nəticəsində həyata keçirilib.

İranın Xarici İşlər Nazirliyi isə bu şəxslərin geri qaytarılmasını koordinasiya etdiyini açıqlayıb. Jurnalistlər deportasiya olunanların doğma ölkələrində üzləşə biləcəkləri potensial risklərə baxmayaraq, əməliyyatın həyata keçirildiyini vurğulayıblar.