ABŞ altıncı nəsil döyüş təyyarəsinin istehsalına başlayır

ABŞ Prezidenti Donald Tramp “Boeing”ə növbəti nəsil qırıcı təyyarənin hazırlanması üçün müqavilə təqdim edib.

Amerika lideri müvafiq bəyanatı Ağ Evin Oval kabinetində Pentaqon rəhbəri Pit Heqsetlə birlikdə jurnalistlərə açıqlamasında bildirib.

Trampın sözlərinə görə, qırıcı təyyarəyə “F-47” adı veriləcək:

“F-47 indiyə qədər istehsal edilmiş ən qabaqcıl, ən bacarıqlı və ən ölümcül təyyarə olacaq. Təyyarənin eksperimental versiyasının sınaq uçuşları təxminən 5 ildir ki, gizli şəkildə həyata keçirilir. Biz əminik ki, dünyada heç nə onunla müqayisə belə edilə bilməz”.

Trampın fikrincə, bu müqavilə ABŞ müdafiə sənayesinə tarixi sərmayədir və ölkənin aerokosmik sahədə liderliyini gücləndirəcək. Ağ Ev rəhbəri çıxışı zamanı “F-47”nin bir neçə unikal xüsusiyyətini də vurğulayıb:

“Təyyarə istənilən sayda dronu idarə edə bilir və onlarla unikal əməliyyatlar həyata keçirir. “F-47” praktiki olaraq radarlar üçün görünməzdir və düşmənlər onun gəldiyini bilməyəcək. Digər döyüş təyyarələri ilə müqayisədə həm manevr qabiliyyətində, həm də sürət baxımından misilsizdir”.

Tramp sonda qeyd edib ki, ABŞ-nin bir çox müttəfiqi artıq “F-47”nin alınmasına maraq göstərir. Bununla belə, o, bəzi ölkələrə satılacaq versiyaların 10% zəiflədilmiş modifikasiyada olacağını bildirib.