ABŞ avropalı liderləri “qara siyahı”ya saldı | Berlin Vaşinqtona meydan oxudu

Almaniya hökuməti ABŞ-nin Almaniyada yerləşən "HateAid" təşkilatının liderlərinə qarşı viza məhdudiyyətlərini kəskin tənqid edib.

Etirazı Almaniyanın ədliyyə naziri Stefani Hubiq "X" hesabında yazıb.

O, ABŞ administrasiyasının senzura ittihamlarını rədd edib: "HateAid" rəqəmsal məkanda qanunsuz nifrət təbliğatının qurbanlarını dəstəkləyir. Təşkilat rəqəmsal sahədə fərdi hüquqların qorunmasının təmin edilməsinə mühüm töhfə verir. Bunu senzura adlandıran hər kəs bizim qanunun aliliyi sistemimizi təhrif edir. Almaniyada və Avropada rəqəmsal sahədə yaşamaq istədiyimiz qaydalar Vaşinqtonda müəyyən edilməyib".

Öz növbəsində Almaniyanın xarici işlər naziri Yohann Vadeful da "X" hesabında ABŞ tədbirlərini tənqid edərək onları qəbuledilməz adlandırıb: "ABŞ tərəfindən tətbiq edilən giriş qadağaları, o cümlədən HateAid təşkilatının liderlərinə qarşı tətbiq edilən qadağalar qəbuledilməzdir".

O, Avropa İttifaqının Rəqəmsal Xidmətlər Qanununun Avropa Birliyi üçün qəbul edildiyini və heç bir ekstraterritorial təsiri olmadığını vurğulayıb: "Tərəfdaşlığımızı gücləndirmək üçün ABŞ ilə hər hansı bir fikir ayrılığını transatlantik dialoq vasitəsilə aydınlaşdırmaq istəyirik".