ABŞ bu razılaşma ilə Ukraynadan pay alacaq | "NBC news" məlumat yaydı

Rusiya rəsmiləri ABŞ-yə Moskvanın nəzarəti altında olan kritik mineralların və metalların hasilatından qazanc əldə etməyə imkan verən saziş təklif ediblər.

Bu barədə “NBC Nyus” kəşfiyyat məlumatları ilə tanış olan iki ABŞ rəsmisinin, eləcə də başqa bir mənbənin sözlərinə istinadən məlumat dərc edib.

Mənbələr qeyd edir ki, Rusiya Tramp administrasiyasına mümkün saziş təklif edib ki, bu razılaşmaya əsasən, Ukraynanın Rusiya ordusunun nəzarətində olan ərazilərində çıxarılan nadir torpaq mineralları və digər qiymətli metallarda ABŞ pay alacaq.

ABŞ rəsmiləri bildiriblər ki, Rusiya nümayəndələri ötən həftə Səudiyyə Ərəbistanında Tramp administrasiyasının rəsmiləri ilə görüş zamanı bu fikri irəli sürüblər.

ABŞ-yə mineral ehtiyatlara çıxışı təmin edə biləcək Rusiyanın təklif etdiyi variantlar arasında Moskvanın 2022-ci ildə qeyri-qanuni olaraq işğal etdiyi Donetsk və Zaporojye vilayətləri də var.

Qeyd edək ki, Rusiya lideri Vladimir Putin də buna işarə edərək, "amerikalı partnyorlarla yeni regionlar da daxil olmaqla, nadir torpaq elementlərinin işlənməsi sahəsində birgə fəaliyyətə hazır" olduğunu bildirmişdi.