ABŞ bu səbəbə görə İrana qarşı sanksiyaları dayandırdı

Amerika Birləşmiş Ştatları İranla əsir mübadiləsini həyata keçirmək məqsədilə 6 milyard dollar dəyərindəki İran vəsaitlərinin Cənubi Koreyadan Qətərə köçürülməsinə icazə verib. Bu məqsədlə hökumət İrana tətbiq etdiyi sanksiyaları dayandırıb.

Məlumat üçün bildirək ki, sanksiyaların dayandırılması Almaniya, İrlandiya, Qətər, Cənubi Koreya və İsveçrənin əsas yurisdiksiyasına daxil olan bəzi maliyyə institutlarına şamil edilir. Onlar ABŞ-nin sanksiyaları altında İran Milli Neft Şirkəti, İran Mərkəzi Bankı və digər İran maliyyə qurumları ilə əməliyyatlarda iştirak edə biləcəklər.

Bu barədə “Reuters” agentliyi əldə olunan sənədlərə istinadən məlumat yayıb.

Belə ki, tərəflər arasında İranda saxlanılan 5 ABŞ vətəndaşının və eyni zamanda ABŞ-də saxlanılan 5 iranlının azadlığa buraxılmasına dair razılaşma əldə olunub. ABŞ-İran razılaşmasının əsas müddəaları avqustun 10-da ictimailəşdirilib.

ABŞ-nin Dövlət Departamentindən verilən məlumata görə, dövlət katibi Entoni Blinken sanksiyalardan imtinanın ölkənin milli təhlükəsizlik maraqlarına cavab verdiyi qənaətinə gəlib.

Məlumat üçün bildirək ki, 2 ölkə arasında məhbus mübadiləsinin həyata keçirilməsi ilk dəfədir ki, ictimaiyyətə rəsmi şəkildə açıqlanıb. Qurumdan bildirilib ki, İrana məxsus vəsaitlərin köçürülməsi Tehrana yalnız cüzi fayda verə bilər, çünki vəsaitin ancaq humanitar yardım məqsədilə istifadəsinə icazə verilib.

Qeyd edək ki, 6 milyard dolların transfer edilməsi və məhbusların mübadiləsi gələn həftə baş tuta bilər.