ABŞ-də araşdırma: Hərbçilərin xərçəngə yoluxma səbəbi

ABŞ-nin nüvə raketlərinin saxlanıldığı Malmstryom hərbi bazasında xidmət aparan zabitlər arasında qan xərçənginə yoluxma halları artıb.

Bu barədə "Associated Press"in köşə yazarı Tara Kopp məlumat verib. O bu qənaətə ABŞ Kosmik Qüvvələrinin polkovnik-leytenantı Daniel Sibekin bu ay təşkil etdiyi brifinqdə açıqladığı rəqəmlərə görə gəlib.

Qeyd edilir ki, artıq 9 zabitdə limfoma xərçəngi üzə çıxıb. Sibek onlardan birinin dünyasını dəyişdiyini, dördünün isə xidmətini davam etdirdiyini bildirib. Polkovnik-leytenant zabitlər arasında xəstəliyin çoxalmasının xüsusi narahatlığa səbəb olduğunu vurğulayıb.

Qeyd olunub ki, Malmstryom hərbi bazasında təxminən 3 300 nəfər xidmət edir. Onlardan 400-ü raketçidir. Daniel Sibek izah edib ki, limfoma xəstəliyi 100 min nəfərdən 19-da rast gəlinə bilən haldır.

Kopp raketçilərin tez-tez yerin dərinliklərinə qapalı liftlərdə, qalın beton və poladdan ibarət olan divarla əhatə olunmuş bunkerə enmələrinə diqqət çəkib. Onun sözlərinə görə, bəzən onlar prezidentin göstərişi olacağı təqdirdə istənilən an raketi buraxmaq üçün bunkerdə bir neçə gün qalmağa məcbur olurlar.