ABŞ-də baş verən yanğında həyatını itirənlərin sayı 16 nəfərə çatdı

ABŞ-nin Los-Anceles vilayətində davam edən meşə yanğınları nəticəsində ölənlərin sayı 16-ya çatıb.

Bu barədə vilayətin Məhkəmə-Tibbi Ekspertiza Ofisi məlumat yayıb.

Bildirilib ki, 5 nəfər Paliseyds, 11 nəfər isə İton bölgəsindəki yanğınlarda həlak olub.

Milli Hava Xidmətinin məlumatına görə, əlverişsiz hava şəraiti gələn həftə də davam edəcək və bu, yanğınsöndürənlərin işini çətinləşdirəcək.

Los-Anceles tarixindəki ən dağıdıcı yanğınlardan biri 10 minə yaxın binanın yanmasına və 150 mindən çox sakinin didərgin düşməsinə səbəb olub. Bu barədə “Bild” xəbər verir.

İlkin hesablamalara görə, ümumi zərər 150 milyard dolları keçə bilər. Zərərçəkənlər arasında Paris Hilton, Entoni Hopkins və Con Qudman kimi məşhur amerikalılar da olub. Onların Malibu bölgəsindəki evləri yanğın nəticəsində külə dönüb.

Bununla belə, xarabalıqlar arasında 2000-ci ildə sahildə tikilən müasir üçmərtəbəli villa demək olar ki, toxunulmaz olaraq qalıb. Dəyəri təxminən səkkiz milyon dollar olan bina böyük tullantıların idarə olunması şirkətinin rəhbəri Devid Ştaynerə məxsusdur. Ətrafındakı qonşu evlər tüstülənir, lakin onun villası salamat qalıb.