ABŞ-də hər beş işçidən birinin köməyinə bu xidmətlər çatır

ABŞ-də aparılan yeni araşdırma süni intellektin əmək bazarına təsirinin sürətlə artdığını göstərir.

Keçirilən sorğunun nəticələrinə görə, tam ştatlı çalışanların 20 faizi işlərində bəzi tapşırıqların süni intellekt tərəfindən yerinə yetirildiyini bildirib.

Martın əvvəlində 2 min nəfər arasında aparılan sorğu göstərir ki, süni intellekt həm işləri avtomatlaşdırır, həm də yeni imkanlar yaradır. Hər 5 işçidən biri mövcud tapşırıqlarının süni intellektə ötürüldüyünü qeyd edərkən, respondentlərin 15 faizi bu texnologiya sayəsində əvvəllər edə bilmədikləri yeni işlər gördüklərini bildirib.

İstifadəçilərin təxminən yarısı həftədə 2-5 gün süni intellektdən yararlanır. Lakin onların 62,5 faizi texnologiyanı yalnız sadə və sürətli tapşırıqlar üçün istifadə edir, cəmi 6 faizi isə intensiv istifadə edir.

Araşdırmada diqqət çəkən məqamlardan biri işçilərin süni intellektdən istifadə zamanı şəxsi hesablarından yararlanmasıdır. Belə ki, respondentlərin təxminən yarısı iş tapşırıqlarını yerinə yetirərkən şirkət tərəfindən təqdim olunan rəsmi alət əvəzinə şəxsi və ya pulsuz versiyalardan istifadə edir.

Bununla yanaşı, "süni intellekt agentləri" adlandırılan və istifadəçi əvəzinə müstəqil tapşırıqlar yerinə yetirə bilən sistemlərin istifadəsi də sürətlə yayılır. Sorğuya əsasən, hər 12 amerikalıdan biri son bir həftə ərzində belə texnologiyadan istifadə edib.

Mütəxəssislər bildirirlər ki, bu tendensiya əmək bazarında ciddi dəyişikliklərə səbəb olur. Belə ki, süni intellektin təsiri nəticəsində aylıq orta hesabla 16 min iş yeri aradan qalxır. Bu isə əmək bazarının real vaxtda yenidən formalaşdığını göstərir.