ABŞ-də senatorlarla bağlı araşdırma aparılır

ABŞ-də Federal Prokurorluq və Federal Təhqiqat Bürosu Nyu-Cersidən olan senator, Xarici Əlaqələr Komitəsinin sədri – ermənipərəst Robert Menendez və onun milliyyətcə erməni olan həyat yoldaşı Nadin Arslanyanın halal ət istehsalı üzrə fəaliyyət göstərən və barəsində təhqiqat araşdırmaları aparılan şirkətdən lüks avtomobil və Vaşinqtonda mənzil formasında rəsmiləşdirilməmiş hədiyyələr alıb-almadığını araşdırır.

“The New York Times” yazır ki, adıçəkilən ət şirkətinin ofislərində, onun prezidentinin evində axtarışlar aparılıb və bu axtarışlar Misir hökumətinin 2019-cu ildə ABŞ-nin “IS EG Halal” ət şirkətini yeganə səlahiyyətli idxalçı etmək qərarından sonra başlayıb. ABŞ Kənd Təsərrüfatı Nazirliyi xəbərdarlıq edib ki, bu qərar Misirdəki 90 milyon müsəlman üçün ətin qiymətinin artmasına yol açmaqla bərabər, həm də bazar nizamını poza bilər.

Xarici Əlaqələr Komitəsinin sədri Robert Menendez istintaqın gedişində müstəntiqlərə yardım etməyə hazır olduğunu bildirib, eyni zamanda bu araşdırmanın heç bir nəticə verməyəcəyinə əminliyini vurğulayıb.