ABŞ-də yeni büdcə təşəbbüsü ciddi qalmaqala səbəb olub

ABŞ-də Respublikaçılar Partiyasının müzakirəyə çıxardığı yeni büdcə təşəbbüsü ciddi qalmaqala səbəb olub.

"Axios" nəşrinin yaydığı məlumata görə, partiya nümayəndələri federal səhiyyə xərclərinin azaldılması hesabına genişmiqyaslı maliyyə paketini formalaşdırmaq niyyətindədir.

Söhbət təxminən 200 milyard dollarlıq büdcə layihəsindən gedir. Bu vəsaitin əsasən İranla bağlı mümkün hərbi qarşıdurmaya hazırlıq və ABŞ-nin immiqrasiya siyasətinin sərtləşdirilməsinə yönəldilməsi planlaşdırılır.

Məlumata görə, xüsusilə sosial təminat və dövlət dəstəkli tibbi proqramlarda ixtisarların aparılması nəzərdən keçirilir. Bu isə artıq siyasi arenada kəskin reaksiyalara səbəb olub.

Analitiklər hesab edirlər ki, belə addım seçkilər ərəfəsində Respublikaçılar üçün ciddi risk yarada bilər. Çünki rəqiblər bu təşəbbüsü "səhiyyəni qurban verib müharibəni maliyyələşdirmək" kimi təqdim edərək ictimai rəyə təsir etməyə çalışacaqlar.

Qeyd olunur ki, ABŞ-də səhiyyə sahəsi ən həssas mövzulardan biridir və bu istiqamətdə atılacaq hər hansı ixtisar geniş narazılıq dalğası yarada bilər. Hazırda məsələ ətrafında müzakirələr davam edir və layihənin yekun variantının necə olacağı hələlik açıqlanmayıb. Lakin artıq indidən bu təşəbbüsün ABŞ siyasətində yeni qarşıdurma mərhələsi yaradacağı gözlənilir.