ABŞ-də yüzlərlə insan saxlanılan türk qadına görə küçələrə axışdı

Türkiyə vətəndaşı və ABŞ-də “Fulbright” təqaüd proqramı ilə doktorantura təhsili alan Rumeysa Öztürk ölkənin federal hüquq-mühafizə orqanları tərəfindən saxlanılıb.

Yerli medianın yaydığı məlumata görə, Öztürk İsrailin Qəzzadakı hərbi əməliyyatlarını tənqid etdiyi məqaləsi əsas gətirilərək saxlanılıb.

Saxlanılma prosesi ABŞ İmmiqrasiya və Gömrük Təhlükəsizliyinin əməkdaşları tərəfindən həyata keçirilib, onun Öztürkün ABŞ vizası ləğv edilib.

Rumeysa Öztürkün saxlanılmasından sonra onun vəkili və təhsil aldığı universitet rəhbərliyi tələbədən xəbər ala bilmədiklərini açıqlayıblar.

Bütün bunlara cavab olaraq tələbənin yaşadığı Massaçusets ştatında insanlar Öztürkün azad olunması üçün küçələrə axışıblar. ABŞ senatoru Elizabet Uorren də Türkiyəli tələbənin saxlanılmasına etiraz edib. O, hazırkı hökumətin tələbələri hədəf aldığını və bunun insanların söz azadlığının pozulması olduğunu vurğulayıb.

Lakin ABŞ İmmiqrasiya və Gömrük Təhlükəsizliyindən verilən açıqlamada Trampın əmri ilə həyata keçirilən addıma bir daha haqq qazandırılıb.

Qeyd edək ki, bu, Vaşinqtonun atdığı ilk belə addım deyil. Cəmi bir neçə gün əvvəl ABŞ-də təhsil alan iranlı tələbə də saxlanılıb.

Görünən mənzərə onu deməyə əsas verir ki, demokratiyanın beşiyi hesab olunan ABŞ artıq azadlığın sütunlarını öz əlləri ilə dağıtmağa başlayıb. Son günlərdə onlarla tələbənin İsrail əleyhinə fikirlərinə görə həbsi bunu sübut edir. Onu da qeyd edək ki, Tramp hökumətinin müsəlman ölkələrindən gələn şəxsləri xüsusi olaraq hədəf alması da gözlərdən yayınmır.