ABŞ-dəki etirazlardan sensasiyalı görüntülər | Ölkədə ara daha da qarışdı

ABŞ-nin Kaliforniya ştatında Los-Ancelesdəki etirazları işıqlandıran Avstraliyanın “9News” telekanalının xüsusi müxbiri reportaj zamanı polis tərəfindən ayağından güllələnib. Telekanal hadisənin görüntüsünü yayımlayıb.

"Hazırda jurnalist və onunla birlikdə çalışan operator təhlükəsiz şəraitdədir, onlar hadisələrin işıqlandırılmasını davam etdirəcəklər", – deyə telekanalın açıqlamasında bildirilib.

Qeyd edək ki, Los-Ancelesdə artıq üç gündür ki, etirazlar və kütləvi iğtişaşlar səngimək bilmir. Aksiya iştirakçıları qanunsuz miqrantların kütləvi şəkildə saxlanılmasına qarşı etiraz edir.

Ağ Evin aparat rəhbərinin müavini Stiven Miller bu yürüşləri və baş verən iğtişaşları üsyan adlandırıb. Şəhərin polis rəisi miqrantların kütləvi deportasiyasında iştirakdan imtina edib.

Ağ Ev rəhbəri Donald Tramp bunun əvəzində iğtişaşların yatırılması üçün şəhərə 2 min milli qvardiya əsgərinin göndərilməsi barədə göstəriş verib. Yerli medianın məlumatına görə, etirazlar zamanı iki polis məmuru yaralanıb, 56 nəfər həbs edilib. Ən azı, beş avtomobil yandırılıb.