ABŞ-dən Rusiyaya sərt cavab
ABŞ administrasiyası Rusiyanın Strateji Hücum Silahlarının azaldılması Müqaviləsində iştirakını dayandırdıqdan sonra onun hərəkətlərinə nəzarəti davam etdirir.
Bu barədə ABŞ Dövlət Departamentinin mətbuat xidmətinin rəhbəri Ned Prays jurnalistlər üçün keçirdiyi növbəti brifinqdə bildirib.
Diplomatın sözlərinə görə, əgər lazım gələrsə, Vaşinqton Moskvaya cavab verməyə hazırdır: “Rusiya Federasiyasının məlum bəyanatı təəssüf doğurur. ABŞ bu addımı “məsuliyyətsiz” hesab edir. Rəsmi Moskva nüvə məsələsi ilə bağlı hər hansı addım atsa, biz istənilən şəraitdə ölkəmizin və müttəfiqlərimizin təhlükəsizliyini təmin edəcəyik. Təbii ki, ABŞ dünyada və iki ölkə arasındakı münasibətlərdə baş verənlərdən asılı olmayaraq, istənilən vaxt Rusiya ilə strateji silahların məhdudlaşdırılması barədə danışmağa hazırdır. Söhbət silahlara nəzarət və strateji sabitlik üzrə danışıqlardan gedir”.
N.Prays hesab edir ki, ABŞ və Rusiya arasında gərginliyin artdığı bir vaxtda sözügedən məsələlər bütün dünyanın diqqətində olmalıdır.