ABŞ-dən Türkiyəyə F-16 şərti

ABŞ Prezidenti Co Baydenin administrasiyası F-16 qırıcılarının satışı ilə Türkiyəyə şərt qoyub.

Söhbət Ankaranın İsveç və Finlandiyanın NATO-ya daxil olması üçün müraciətləri təsdiqləməsindən gedir. Bu barədə ABŞ dövlət katibinin müavini Viktoriya Nuland məlumat verib.

“Biz bunu türkiyəli müttəfiqlərimizə demişdik. Yəqin ki, Türkiyə Finlandiya və İsveçin NATO-ya daxil olmasına dair sənədləri ratifikasiya etdikdən sonra F-16-ların satışına daha müsbət yanaşılacaq”, - deyə Nuland bildirib.

Qeyd edək ki, bu günlərdə Türkiyə Prezidenti Rəcəb Tayyib Ərdoğan bildirib ki, İsveç Stokholmdakı qalmaqallı aksiyalardan sonra NATO-ya müraciət üçün dəstək gözləməməlidir.