ABŞ hərbi əməliyyatın xərclərini ərəb ölkələrindən almaq istəyir

ABŞ Vaşinqtonun İrana qarşı hərbi əməliyyatının xərclərini ərəb dövlətlərinin ödəməsində maraqlıdır.

Bu barədə Ağ Evin mətbuat katibi Kerolayn Livitt jurnalistlər üçün keçirilən müntəzəm brifinqdə bildirib.

"Düşünürəm ki, Amerika Birləşmiş Ştatları Prezidenti Donald Tramp onları buna təşviq etməkdə çox maraqlı olardı. Bu məsələdə ABŞ liderindən önə keçməyəcəyəm. Amma əminəm ki, onun bu fikri var", – deyə o, Vaşinqtonun ərəb ölkələrinin İrana qarşı əməliyyatını maliyyələşdirməsini istəyib-istəməməsi sualına cavab olaraq bildirib.

O, ABŞ administrasiyasının rəhbərinin daha sonra bu məsələ ilə bağlı özü şərh verəcəyinə söz verib. Həmçinin Ağ Evin sözçüsü ABŞ-İran danışıqları barədə suala da aydınlıq gətirib.

“ABŞ və İran arasında danışıqlar hələ də davam edir və çox yaxşı gedir. Qalan rejim nümayəndələrinin dağıntılara son qoymaq və hələ də fürsətləri olduğu müddət ərzində danışıqlar masasına gəlmək üçün getdikcə daha çox can atması təəccüblü deyil. Danışıqlar davam edir və əlbəttə ki, açıq şəkildə deyilənlər bizə şəxsi olaraq deyilənlərdən çox fərqlidir", – deyə Livitt əlavə edib.