ABŞ-İran danışıqları necə olacaq? | "Amerika bu prosesdə ciddi iştirak edəcək" - Baku TV

İranın xarici işlər naziri Abbas Əraqçi Tehrandan Omanın paytaxtı Masqata gedib.

Bu barədə İran Xarici İşlər Nazirliyinin sözçüsü İsmayıl Bəqai məlumat yayıb.

"Xarici işlər naziri Abbas Əraqçi ABŞ ilə nüvə danışıqları aparmaq üçün diplomatik nümayəndə heyətinə rəhbərlik edərək Masqata getdi. Bu diplomatik təşəbbüs nüvə məsələsi üzrə ədalətli, qarşılıqlı və şərəfli razılaşmaya nail olmaq məqsədilə həyata keçirilir", – deyə Bəqai "X" hesabında yazıb.

Bundan əlavə, o bildirib ki, keçmişin acı təcrübələri, o cümlədən öncəki öhdəliklərin pozulması unudulmayıb:

"Biz həmişə özümüzü İran xalqının hüquqlarını müdafiə etməyə borclu hesab edirik. Eyni zamanda, İran xalqının maraqlarını təmin etmək, regionda sülh və əmin-amanlığı qorumaq üçün diplomatiyadan istifadə etmək imkanını əldən verməmək məsuliyyətimiz var. Bu prosesin formalaşmasında məsuliyyətli rol oynayan bütün dost, qonşu və region ölkələrini yüksək qiymətləndiririk. Ümid edirik ki, Amerika tərəfi bu prosesdə məsuliyyət hissi, realizm və ciddiliklə iştirak edəcək".