ABŞ İranın nüvə obyektlərinə dəyən ziyan üçün ödəniş edəcək?

“ABŞ danışıqların bərpasından əvvəl İranın nüvə obyektlərinə zərbələr nəticəsində dəymiş ziyanı ödəməlidir”.

Bunu İranın xarici işlər naziri Abbas Ərağçi “The Financial Times”a müsahibəsində bildirib.

"İran ABŞ ilə danışıqlara yalnız ABŞ-nin müharibə nəticəsində dəymiş ziyanı ödəyəcəyi, belə hücumların təkrarlanmayacağına zəmanət verəcəyi və uran zənginləşdirmə hüququnu tanıyacağı təqdirdə başlayacaq. Yeganə çıxış yolu danışıqlardır və İran sülhə sadiqdir, lakin təzyiq və təhdidlər qarşısında geri çəkilməyəcək", – deyə o qeyd edib.

XİN başçısının sözlərinə görə, 12 günlük münaqişə zamanı və ondan sonra o, ABŞ Prezidentinin Yaxın Şərq üzrə xüsusi nümayəndəsi Stiv Uitkofla danışıb. Nazir vurğulayıb ki, belə bir təzminat ölkələr arasında "etimadın möhkəmlənməsi üçün vacibdir".