ABŞ Mərkəzi Komandanlığı yeni görüntülər paylaşdı

İran cümə axşamı axşam saatlarında ABŞ və Böyük Britaniyanın birgə istifadə etdiyi Dieqo Qarsiya hərbi bazasına iki ballistik raket atıb.

Bu barədə "The Wall Street Journal" bir neçə amerikalı rəsmi şəxsə istinadən məlumat yayıb.

Raketlərdən biri uçuş zamanı mühərrikində yaranan nasazlıq səbəbindən düşüb, digəri isə ABŞ hərbi gəmisi tərəfindən vurulub.

Dieqo Qarsiya adası İrandan təxminən 4000 kilometr məsafədə yerləşir ki, bu da İran raketlərinin maksimum 2000 kilometr uzaqlıqdakı hədəfləri vura biləcəyi barədə məlumatların həqiqəti əks etdirmədiyini, Tehranın uzaqmənzilli raketlərin hazırlanmasında irəliləyiş əldə etdiyini göstərir.

Hind okeanındakı Dieqo Qarsiya adası ABŞ-ın bombardmançı təyyarələr, nüvə sualtı qayıqları və idarəolunan raketlərlə təchiz olunan esmineslər yerləşdirdiyi strateji baza kimi fəaliyyət göstərir.

Bu arada, ABŞ Mərkəzi Komandanlığı İran Hərbi Qüvvələrinə aid olan texnikaları məhv edib. Bu barədə görüntüləri Mərkəzi Komandanlıq "X" hesabında paylaşıb.

"İranın imkanları azalır", – deyə ABŞ Mərkəzi Komandanlığının komandiri admiral Bred Kuper bildirib.

İran tərəfindən İsrailin mərkəzi rayonlarına buraxılan ballistik raket kaset tipli döyüş başlığı daşıyıb. Bu barədə “The Times of Israel” məlumat yayıb. Hələ ki xəsarət alanlarla barədə məlumat daxil olmayıb.