ABŞ nəşrindən sensasiyalı iddia

ABŞ hökumətinə tabe olan Mərkəzi Kəşfiyyat İdarəsi HƏMAS-ın yüksək rütbəli liderləri və Qəzzadakı girovların məskunlaşdığı yerlər barədə əldə etdiyi kəşfiyyat məlumatlarını İsrailə ötürür.

Bu barədə ABŞ-nin “New York Times” nəşri məlumat yayıb. Bildirilir ki, oktyabrın 7-də İsrailə edilən hücumlardan dərhal sonra qruplaşma ilə mübarizə məqsədilə yeni əməliyyat qrupu yaradılıb.

Nəşrin hesabatına görə, Ağ Evin milli təhlükəsizlik üzrə müşaviri Ceyk Sallivanın tələbi ilə yaradılan bu bölmə yalnız HƏMAS-ın yüksək səviyyəli rəhbərlərinin axtarışı üçün nəzərdə tutulub.

ABŞ rəsmiləri HƏMAS quruplaşmasının oktyabrın 7-dən əvvəl ölkə üçün 4-cü, hücumdan sonra isə 2-ci prioritet səviyyəsinə yüksəldildiyini bildirib.

Rəsmi Vaşinqton hesab edir ki, oktyabr hücumlarının yaradıcısı hesab edilən Yəhya Sinvar və Məhəmməd Deif kimi yüksək səviyyəli şəxslərin tapılması İsrail Ordusunun qələbə çalması deməkdir. Bütün bunlara baxmayaraq, ABŞ kəşfiyyatının Yəhya Sinvarı ələ keçirməsi son dərəcə mürəkkəb proses hesab olunur.

Qeyd edək ki, İsrail qüvvələri Livanın paytaxtı Beyrutda HƏMAS rəsmisi Salih əl-Arurini məhv edib. ABŞ administrasiyası isə onunla bağlı kəşfiyyat məlumatlarını İsrailə vermədiyini açıqlayıb.