ABŞ-nin Keniyada həyata keçirəcəyi layihəsi narazılıqla qarşılanıb

Keniyanın mərkəzində yerləşən Nanyuki şəhərində ABŞ-nin dəstəklədiyi Ebola karantin mərkəzinə qarşı keçirilən etiraz aksiyaları zamanı polis gözyaşardıcı qazdan istifadə edib və bir neçə nəfəri saxlayıb.

"Reuters"in verdiyi məlumata görə, hüquq-mühafizə orqanları səhər saatlarında yollarda toplaşan etirazçı qruplarını dağıdaraq ən azı altı nəfəri həbs edib. Polis kütləni dağıtmaq üçün gözyaşardıcı qaz və su şırnaqlarından istifadə edib.

Qeyd edək ki, mübahisələrə səbəb olan layihə hava qüvvələri bazasında 50 çarpayılıq Ebola karantin mərkəzinin tikintisini nəzərdə tutur. Bir çox keniyalı ABŞ-ni Konqonun şərqində və Uqandada baş verən Ebola epidemiyaları ilə bağlı riskləri ölkələrinə yönəltməkdə ittiham edir.

Məhkəmənin tikintinin dayandırılması barədə qərar verməsinə baxmayaraq, layihə ətrafında gərginlik davam edir. Ötən həftə keçirilən etiraz aksiyaları zamanı iki nəfər həyatını itirib. Keniya və ABŞ rəsmilərinin layihəyə sadiqliklərini bir daha bəyan etməsi isə yerli sakinlərin narazılığını daha da artırıb.