ABŞ-nin Ukrayna üzrə sülh planı müzakirə edildi

Rusiya Prezidenti Vladimir Putin türkiyəli həmkarı Rəcəb Tayyib Ərdoğanla telefonla danışıb.

Xarici medianın məlumatına görə, liderlər Ukraynadakı vəziyyət və ABŞ-nin təklifləri kontekstində fikir mübadiləsi aparıblar.

Putin Rusiyanın Ukrayna böhranının siyasi və diplomatik yolla həllində maraqlı olduğunu vurğulayıb.

Vladimir Putin sözügedən təkliflərin Alyaskada keçirilən Rusiya-Amerika sammitindəki müzakirələrə uyğun olduğunu bəyan edib. Onun sözlərinə görə, bu təkliflər yekun sülh yolu ilə həll üçün əsas təşkil edə bilər.

Türkiyə Prezidenti Rəcəb Tayyib Ərdoğan danışıqlar prosesinə istənilən köməyi göstərməyə, o cümlədən İstanbul platformasının mövcudluğunu davam etdirməyə daim hazır olduğunu bildirib.

Putin və Ərdoğan Ukrayna məsələsi ilə bağlı müxtəlif səviyyələrdə Rusiya-Türkiyə təmaslarını intensivləşdirmək barədə razılığa gəliblər.

Qeyd edək ki, iki ölkə lideri müntəzəm təmasları davam etdirmək barədə də anlaşıblar.