ABŞ-nin yeni mövqeyi Britaniya ilə münasibətlərə necə təsir göstərəcək? - Baku TV

ABŞ London müdafiə xərclərini artırmasa, Böyük Britaniyanı Malvin – Folklend adalarının mənsubiyyəti məsələsində mövqeyinə yenidən baxmaqla hədələyə bilər.

Bu barədə "Telegraph" qəzeti yüksəkvəzifəli amerikalı məmura istinadən yazıb.

Nəşrin məlumatına görə, Vaşinqton rəsmi olaraq neytral mövqe tutur və arxipelaq üzərində nə Böyük Britaniyanın, nə də Argentinanın suverenliyini tanıyır. Bununla belə, ABŞ adaların faktiki olaraq Britaniya tərəfindən idarə edilməsini qəbul edir.

Vurğulanır ki, Pentaqon NATO ölkələrini müdafiə xərclərinin artırılması ilə bağlı öhdəliklərini yerinə yetirməyə təşviq etmək üçün tədbirlər hazırlayır.

Qəzetin həmsöhbəti bildirib ki, Vaşinqton Böyük Britaniyanı hərbi sahədə ABŞ-nin potensial aparıcı tərəfdaşı hesab edir. Lakin məmurun sözlərinə görə, Londonun iyun ayında müdafiə investisiyaların artırılması ilə bağlı açıqladığı planlar hələlik ABŞ tərəfini tam qane etmir.

O bu vəziyyət fonunda ABŞ-nin Folklend adaları ilə bağlı mövqeyinə yenidən baxa biləcəyini istisna etməyib.

Qeyd edək ki, Malvin adaları Argentina ilə Böyük Britaniya arasında mübahisəli ərazidir. 1982-ci ildə ölkələr arasında Argentina tərəfinin məğlubiyyəti ilə nəticələnən silahlı münaqişə baş verib. 2013-cü ildə adaların sakinləri Böyük Britaniyanın dənizaşırı ərazisi statusunun lehinə səs veriblər. Səsvermədə seçicilərin 99,8 faizi bu statusu dəstəkləyib.