ABŞ Prezidenti Zelenski və Avropa liderləri ilə danışıqlar apardı

ABŞ Prezidenti Donald Tramp ukraynalı həmkarı Volodimir Zelenski və Avropa liderləri ilə danışıqlar aparıb.

Bu barədə “Axios” portalı məlumat yayıb.

“Reuters”in məlumatına görə, danışıqlarda Almaniya, Finlandiya, Fransa, Böyük Britaniya, İtaliya, Polşa və Avropa İttifaqı liderləri, həmçinin NATO-nun Baş katibi Mark Rutte iştirak edib.

Danışıqlar zamanı Ukrayna əraziləri ilə bağlı məsələlər müzakirə edilib. Bunu Prezident Volodimir Zelenski videokonfransın yekunlarına dair birgə mətbuat konfransında deyib.

“Biz Alyaskada görüş haqqında danışdıq. Ümid edirik ki, danışıqların əsas məqamı atəşkəs olacaq”, ‒ deyə Ukrayna lideri bildirib.

V.Zelenski bir daha qeyd edib ki, Ukrayna Konstitusiyası onun ərazi bütövlüyünün pozulmasına imkan vermir.

“Nə qədər ki, dövlətin konstitusiyası dəyişməz olaraq qalıb, mənim başqa mövqeyim ola bilməz”, ‒ deyə o əlavə edib.

Almaniya kansleri Fridrix Merts isə Kiyevlə onun Aİ və NATO tərəfdaşları tərəfindən razılaşdırılan əsas prinsipləri açıqlayıb.

“Sonrakı görüşlər olarsa, Ukrayna danışıqlar masasında olmalıdır. Danışıqlar düzgün qaydada aparılmalıdır – atəşkəs ilkin mərhələdə olmalıdır. Ukrayna ərazi məsələləri üzrə danışıqlara hazırdır, lakin Rusiyanın işğal etdiyi ərazilərin hüquqi cəhətdən tanınması müzakirə belə edilmir. Ukrayna üçün uzunmüddətli təhlükəsizlik zəmanəti lazımdır”, ‒ deyə F.Merts bəyan edib.