ABŞ rusiyalıları casusluğa çağırır

ABŞ-nin Mərkəzi Kəşfiyyat İdarəsi rus dilində hazırladığı video vasitəsilə rusiyalıları casusluq etməyə çağırır.

Məlumata görə, idarə insanlarla daha rahat əlaqəyə keçmək məqsədilə “Telegram” kanalında hesab açıb.

Müxtəlif platformalarda paylaşılan videoda ABŞ-yə casusluq etmək istəyənlərə müraciət edilib: “İqtisadiyyat və ya Rusiya Federasiyasının rəhbərliyi ilə bağlı səndə məlumatlar var? Bizimlə əlaqəyə keç. Mərkəzi Kəşfiyyat İdarəsi Rusiya haqqında həqiqətləri bilmək istəyir və biz bu barədə danışa bilən etibarlı insanlar axtarırıq”, – deyə videonun giriş hissəsində qeyd edilib.

Təqdim olunan videoda işindən və həyatından narazı rusiyalı qadın və kişi dövlət məmurları obrazı təsvir edilir. Çarxın sonunda onların öz smartfonları ilə Mərkəzi Kəşfiyyat İdarəsi ilə əlaqəyə keçdiyi təsvir edilir.

Mərkəzi Kəşfiyyat İdarəsi rusiyalılara “Tor” brauzeri vasitəsilə “DarkWeb”ə daxil ola biləcəkləri şifrələnmiş link də təqdim edib və bunun qurumla əlaqəyə keçmək üçün təhlükəsiz olduğu bildirilib.