ABŞ Rusiyanı buna inandırmalıdır | Zelenskidən vacib açıqlama

ABŞ və Rusiya Rusiya-Ukrayna müharibəsinin sülh yolu ilə həllinə dair görüşlər keçirəcək.

Bunu ABŞ Prezidenti Donald Tramp deyib.

“Söhbət tam atəşkəsdən gedir. Ukrayna buna razılıq verib, ümid edirəm ki, Rusiya da razı olacaq. Biz onlarla görüşməyə hazırlaşırıq. Ümid edirəm ki, razılıq əldə olunacaq. Bu atəşkəs çox vacibdir”, – deyə Tramp bildirib.

Ukrayna Prezidenti Volodimir Zelenski isə deyib ki, Kiyev birtərəfli qaydada atəşi dayandırmayacaq.

Onun sözlərinə görə, əgər Rusiya tərəfi də müvafiq addımı atsa, Ukrayna cəbhə xətti boyunca 30 gün ərzində atəşi dayandıracaq.

Zelenski qeyd edib ki, 30 günlük atəşkəsə əməl olunarsa, Kiyev tərəfdaşları ilə birlikdə uzunmüddətli sülh və təhlükəsizliyə zəmanət verəcək işçi sənədlər hazırlaya biləcək. Belə bir addım atmağa hazırıq və ABŞ Rusiyanı buna inandırmalıdır”, – deyə Ukrayna lideri vurğulayıb.

Qeyd edək ki, Ukrayna ABŞ-nin 30 günlük atəşkəs təklifini qəbul etməyə razılaşıb. Bu barədə Ukrayna və ABŞ-nin Səudiyyə Ərəbistanının Ciddə şəhərində keçirilən danışıqlarının yekunları üzrə birgə bəyanatda qeyd olunub.