ABŞ səfirliyi raketlərlə atəşə tutulub

ABŞ-nin İraqdakı səfirliyi raketlərlə atəşə tutulub.

Ölkə mediasının xəbərinə görə, hadisə zamanı binada həyəcan siqnalı səslənsə də, həmin an səfirliyin hava hücumundan müdafiə sisteminin işə düşüb-düşməməsi məlum deyil. Diplomatik korpusun mətbuat katibi də məsələ ilə bağlı açıqlama verməkdən boyun qaçırıb.

Onu da qeyd edək ki, partlayışla bağlı hələlik heç bir qruplaşma məsuliyyəti öz üzərinə götürməyib.

Məlumat üçün bildirək ki, oktyabrın 7-dən indiyədək ABŞ-nin İraq və Suriyada yerləşən bazaları azı 70 dəfə hücuma məruz qalıb və nəticədə 60-dan çox insan yaralanıb. Sözügedən hücumlara görə “İslami Cihad” təşkilatı məsuliyyəti öz üzərinə götürüb.

Rəsmi Vaşinqton bu hücumlara cavab verib və İranı bu hücumları həyata keçirən hərbi qruplaşmalara aktiv yardım göstərməkdə ittiham edib. ABŞ-nin müdafiə naziri Lloyd Ostin ölkəsinə qarşı edilən və İran tərəfindən dəstəklənən bu hücumların qəbuledilməz olduğunu bildirib.

Bir qədər sonra İranın xarici işlər naziri Hüseyn Əmir Abdullahian da açıqlama verərək bölgədə baş verən proseslərə qarışmadığını, lakin qarşı da çıxmadığını vurğulayıb.