ABŞ senatoru Milli Kəşfiyyat rəhbərini İranla bağlı məlumatları təhrif etməkdə ittiham edib

Vaşinqtonda kəşfiyyat dairələri və qanunverici orqanlar arasında İranla bağlı dərin fikir ayrılığı yaranıb. Baku TV-nin "Dünya" xəbər xidmətinin verdiyi məlumata görə, ABŞ senatoru Mark Uorner Milli Kəşfiyyat direktoru Tulsi Qabbardı İranın nüvə proqramı və hərbi imkanları barədə kəşfiyyat hesabatlarını qəsdən təhrif etməkdə ittiham edib. 2026-cı ilin mart ayının sonunda Senatın Kəşfiyyat üzrə Xüsusi Komitəsində keçirilən dinləmələr zamanı senator Uorner bildirib ki, kəşfiyyat rəhbərliyi İranın nüvə obyektlərinə endirilən zərbələrdən sonrakı real vəziyyəti Donald Tramp administrasiyasının siyasi xəttinə uyğunlaşdırmaq üçün bəzi mühüm detalları gizlədib.

Məlumata əsasən, əsas mübahisə İranın uranı zənginləşdirmə fəaliyyətini bərpa edib-etməməsi ətrafında cərəyan edir. Videoda Senatdakı gərgin debatlar, Tulsi Qabbardın ittihamlara verdiyi cavablar və ABŞ-ın İrandakı "Epic Fury" əməliyyatının kəşfiyyat bazası əks olunub. Reportajda vurğulanır ki, kəşfiyyat məlumatlarının siyasiləşdirilməsi iddiaları Ağ Ev daxilində də ciddi rezonansa səbəb olub.