ABŞ Türkiyəyə "F-16"ların satışını təsdiqlədi

ABŞ Konqresi Türkiyəyə 40 yeni F-16 qırıcısının satışı və mövcud F-16 qırıcılarının modernləşdirilməsi ilə bağlı müqaviləni təsdiqləyib.

Bu barədə ABŞ-nin Türkiyədəki səfirliyinin “X” sosial hesabında məlumat paylaşılıb.

Qeyd edilib ki, Konqresin bu həftə Türkiyənin 40 yeni və 79 təkmilləşdirilmiş F-16 təyyarəsi almasına razılıq verməsi irəliyə doğru atılmış böyük addımdır. Həmçinin Türkiyənin NATO qüvvələri üçün vacibliyi diqqətə çatdırılıb.

Xatırladaq ki, İsveçin NATO-ya üzv olmasına Ankaranın da razılıq verməsinin ardından Cozef Bayden administrasiyası Türkiyəyə F-16 döyüş təyyarələrinin satışını təsdiqləyib. Yanvarın 27-də ABŞ Dövlət Departamenti Türkiyəyə 40 ədəd F-16 qırıcısının satışı və mövcud F-16 donanmasının modernləşdirilməsi ilə bağlı Konqresə rəsmi bildiriş göndərib.

Qeyd edək ki, Türkiyə uzun müddətdir F-16 donanmasını təkmilləşdirməyə çalışır. Ancaq bunun üçün Ankaranın qarşısında İsveçin NATO-ya üzvlüyünü təsdiqləmək şərti qoyulmuşdu. Buna görə də F-16 məsələsi bir ildən artıq müddətə təxirə salınmışdı.

Ankaranın da öz şərtləri var idi ki, bu da Türkiyənin milli təhlükəsizlik problemlərini, o cümlədən qardaş ölkənin təhlükəsizliyə təhdid hesab etdiyi kürd yaraqlılarına və digər qruplara qarşı mübarizəsini İsveçin kifayət qədər ciddiyə almaması ilə bağlı olub.