ABŞ və İran arasında əldə olunan atəşkəs razılaşmasının son vəziyyəti - Baku TV

“Oman Sultanlığı Hörmüz boğazında gəmiçiliyin hər kəs üçün təhlükəsiz və sərbəst qalmasına çalışır”.

ISNA-nın verdiyi xəbər görə, bunu Omanın xarici işlər naziri Bədr əl-Busaidi səsləndirib.

O vurğulayıb ki, Oman bu su yolundan istifadə edən ölkələrlə Hörmüz boğazında dənizçilik və ətraf mühit xidmətlərini könüllü olaraq müzakirə edəcək.

Bədr əl-Busaidi əlavə edib ki, Maskat Hörmüz boğazından keçid üçün rüsumların tətbiqini dəstəkləmir.

Bu arada, Ağ Evin mətbuat katibi Kerolayn Levitt İran və ABŞ arasında yaşanan son qarşıdurmadan danışıb. Onun sözlərinə görə, kommersiya gəmilərinə hücumlar baş verib və ABŞ buna cavab verib.

"ABŞ İranla əldə olunan atəşkəs razılaşması çərçivəsində üzərinə götürdüyü öhdəliklərə əməl edir. Kommersiya gəmilərinə hücumlar oldu və biz cavab verdik. Zorakılığa zorakılıqla cavab veriləcək”, – deyə o əlavə edib.

“İsrail-İran qarşıdurmasının başlamasından sonra İrandan həyata keçirilən kiberhücumların sayı təxminən üç dəfə artıb”. Belə bir açıqlama ilə İsrailin Milli Kibertəhlükəsizlik Agentliyinin baş direktoru Yossi Karadi çıxış edib.

Onun sözlərinə görə, 2025-ci ilin iyununda İsrailin İrana qarşı hərbi əməliyyatları ilə eyni dövrdə təxminən 1600 kiberhücum qeydə alınıb. Bu göstərici 2026-cı ilin eyni dövründə 4800-ə yüksəlib.

“Hücumları həyata keçirən qrupların bir hissəsi yüksək peşəkarlığa malikdir. Ənənəvi hərbi münaqişələrdən fərqli olaraq, kiberməkanda atəşkəs anlayışı yoxdur və buna görə də bu sahədə təhdidlərə qarşı daim hazırlıqlı olmaq lazımdır”, – deyə Yossi Karadi diqqətə çatdırıb.