ABŞ və İsrail məqsədinə çatdı? | Münaqişənin bir ayı tamamlandı

ABŞ və İsrailin İrana qarşı başladığı müharibənin bütün tərəflər üçün nəzarətdən çıxmaq həddinə yaxınlaşdığı və eskalasiyanın qlobal iqtisadiyyata risk yaratdığı bildirilib.

Bu barədə Çin nəşri "Global Times" qəzetinin redaksiya məqaləsində qeyd olunub.

Məqalədə bildirilir ki, ABŞ və İsrailin fevralın 28-dən İrana qarşı başladığı hərbi zərbələrdən artıq bir ay keçir.

Nəşrin fikrincə, qarşıya qoyulan məqsədlərə tam nail olunmayıb və münaqişə tədricən nəzarətdən çıxmaq həddinə yaxınlaşıb.

Qəzet yazır ki, bu qarşıdurmanın geopolitikaya və qlobal nizamın formalaşmasına təsiri artıq hiss olunur. Qeyd olunur ki, ABŞ hökuməti əvvəlcə müharibənin 4-5 həftə davam edəcəyini proqnozlaşdırmışdı, lakin hadisələrin gedişi bunun əksini göstərir.

Nəşrin yazdığına görə, müasir müharibələr başladıqdan sonra onları əvvəlcədən planlaşdırılan ssenari üzrə dayandırmaq çox çətindir və sürətli qələbə əldə etmək cəhdləri uğursuz ola bilər.

"Global Times" həmçinin vurğulayır ki, münaqişə artıq enerji böhranına səbəb olub, tədarük zəncirlərini pozub və dünyada iqtisadi qeyri-müəyyənliyi artırıb. Eskalasiyanın davam etməsi qlobal resessiya riskini də yüksəldə bilər.

Qəzet əlavə edir ki, hazırda ən narahatedici məqamlardan biri zərbələrin yalnız hərbi obyektlərlə məhdudlaşmamasıdır. Bildirilir ki, bəzi hallarda neft emalı zavodları, elektrik stansiyaları və digər mülki infrastruktur obyektləri də hədəfə çevrilir ki, bu da humanitar nəticələri daha ağırlaşdıra bilər.

Bununla yanaşı, nəşr qeyd edir ki, vəziyyət qeyri-müəyyən olsa da, eskalasiyanın azaldılması üçün müəyyən imkanlar mövcuddur. Qəzet tərəfləri təmkinli davranmağa, qarşıdurmanı dərinləşdirməməyə və danışıqlar üçün yaranan imkanları itirməməyə çağırır.