ABŞ Vinniklə bağlı qərar verdi | Vəkildən qələbə açıqlaması

"ABŞ-də həbsdə olan və ötən gecə ölkəsinə təhvil verilən Rusiya vətəndaşı Aleksandr Vinnikin üzərindən ABŞ-də bütün ittihamlar götürülüb".

Bu barədə onun vəkili Arkadi Bux məlumat verib.

"Cinayət işinə xitam verilib və müvəkkilimiz həbsdən azad edilib. Hazırda cənab Vinnik heç bir cinayət qeydi olmayan şəxs hesab olunur və bu, ABŞ məhkəmə sənədləri ilə təsdiqlənib", – deyə Bux bildirib.

Vəkil onu da əlavə edib ki, ittihamlar götürüldükdən sonra Aleksandr Vinnikə ABŞ-nin cinayət sistemində "təmiz səhifə" açılıb və indi o, sərbəst şəkildə, o cümlədən də Avropaya səyahət etmək imkanı əldə edib.

ABŞ qanunlarına görə, üzərindən ittihamlar götürülən şəxs heç vaxt həbs olunmadığını söyləmək hüququna malikdir və sərhədçilərin Vinniki cinayət keçmişinə görə dayandırmaq üçün əsasları yoxdur.

Bütün sənədlər, o cümlədən işin bağlanması, onun azadlığa buraxılması barədə qərar məxfilikdən çıxarılıb və ictimaiyyət üçün açıqdır.

"ABŞ-yə ekstradisiya edilmiş şəxs illərlə həbsdə yatıb, lakin heç bir cinayət qeydi olmadan, tam təmiz reputasiya ilə vətənə qayıtmağı bacarıb. Müştərimiz ABŞ-də təmizdir, ittihamlar götürülüb, bu, nadir haldır.

Bu gün cənab Vinnikin rəsmi rekordu cinayət keçmişinin olmamasıdır, yəni o, istənilən lisenziyalar, müxtəlif ölkələrə vizalar üçün müraciət edə bilər və imtina üçün heç bir əsas olmamalıdır", – deyə Bux qeyd edib.

Vəkil bu hadisənin böyük qələbə olduğunu vurğulayıb.

Xatırladaq ki, Aleksandr Vinnik Rusiyaya qayıdıb. O, 2017-ci ilin yayında ABŞ-nin sorğusu əsasında Yunanıstanda həbs edilib. 2022-ci ildə Vinnik ABŞ-yə ekstradisiya olunub.