ABŞ Yaxın Şərqə Ukrayna istehsalı olan dron əleyhinə vasitələr göndərib - Baku TV

Yaxın Şərqdə genişlənən müharibə fonunda hərbi-texnoloji əməkdaşlıq yeni müstəviyə keçib. Baku TV-nin "Dünya" xəbər xidmətinin verdiyi məlumata görə, Pentaqon İranın kütləvi PUA hücumlarının qarşısını almaq üçün regiona Ukrayna mühəndisləri tərəfindən hazırlanmış 10 min ədəd dron əleyhinə vasitə göndərib. 2026-cı ilin mart ayında reallaşan bu addım, ABŞ-nin ordu naziri Den Driskollun "Bloomberg" agentliyinə verdiyi açıqlama ilə təsdiqlənib. Nazirin sözlərinə görə, süni intellekt (Sİ) sistemləri ilə təchiz edilmiş "Merops" pilotsuz uçuş aparatları İrana qarşı hərbi əməliyyatın başlanmasından cəmi beş gün sonra döyüş bölgəsinə çatdırılıb.

Məlumata əsasən, "Eagle" təşəbbüsü çərçivəsində hazırlanan bu cihazlar qrup halında ("swarming") fəaliyyət göstərmək və düşmən hədəflərini avtonom şəkildə məhv etmək imkanına malikdir. Maraqlıdır ki, sistemin proqram təminatı birbaşa Ukraynada hazırlansa da, seriya istehsalı təhlükəsizlik məqsədilə ABŞ-ın müttəfiq dövlətlərində qurulub. Videoda Ukrayna mütəxəssislərinin İordaniyadakı ABŞ bazasında hərbi təlimlər keçməsi və "Shahed" tipli dronlara qarşı yeni "JEDI Shahed Hunter" sistemlərinin səmərəliliyi barədə kadrlar yer alıb.