“Ukrayna üçün vəziyyət pisləşir” | Sülh planı iflasa uğrayır, yoxsa...?

ABŞ Ordusunun katibi Den Driskol Kiyevə səfər zamanı cəbhədəki vəziyyətlə bağlı bədbin proqnozlar verib. Məqsəd Ukraynaya sülh planının 28 bəndlik versiyasını qəbul etdirmək olub.

Bu barədə “NBC News” məlumat yayıb.

“Ukrayna Silahlı Qüvvələri üçün vəziyyət pisləşir. Rusiya hava hücumlarını artırıb. Çünki müharibənin uzadılması üçün Rusiyanın kifayət qədər resursları var. Ukrayna üçün gözləmək daha zəif hala düşməkdir”, – deyə D.Driskolun ukraynalı məmurlara xəbərdarlıq etdiyi bildirilir.

Digər tərəfdən ABŞ-nin müdafiə sənayesi daha Ukraynanı Hava Hücumundan Müdafiə sistemləri və sursatla təmin edə bilmir. D.Driskolun Kiyevə mesajı “siz uduzursunuz və razılaşmanı qəbul etməlisiniz” kimi yozulub.

ABŞ-nin dövlət katibi Marko Rubio “NBC News”un bu xəbərinə mövqe bildirib. M.Rubio özünün “X” hesabında bəyan edib ki, bu xəbər feyk və uydurmadır. Onun fikrincə, belə dezinformasiyaların yayılmasına səbəb Tramp Administrasiyasındakı fikir ayrılığıdır.

CNN-də yayılan məqalədə isə ABŞ-nin sülh planında Ukraynanın razılaşmadığı 3 əsas bəndə yer verilib. Birincisi, Ukrayna Donbası Rusiyanın nəzarətinə vermək istəmir. Çünki Ukraynanın şərqində elə yerlər var ki, Rusiya həmin əraziləri tam işğal edə bilməyib. İkinci razılaşdırılmayan bənd Ukrayna Ordusunun məhdud sayda olması ilə bağlıdır. ABŞ 600 min hərbçi təklif etdiyi halda Kiyev daha böyük orduya sahib olmaq istəyir. Bu mövzuda danışıqlar davam edir və razılıq əldə olunmayıb. Üçüncü məsələ Ukraynanın NATO-ya üzvlükdən imtina etməsidir. Ukraynalıların fikrincə, bu təklif gələcəkdə Rusiyaya Alyansın genişlənməsinə veto qoymaq hüququ verə bilər.