ABŞ-yə 50-dən çox ölkə müraciət etdi | Ağ Ev rəsmisindən açıqlama

“ABŞ artıq 50-dən çox ölkədən Vaşinqtonun tətbiq etdiyi idxal tariflərinin azaldılması və ya ləğv olunmasını müzakirə etmək üçün danışıqlara başlamaqla bağlı müraciətlər alıb”.

Bunu Ağ Evin Milli İqtisadi Şurasının rəhbəri Kevin Hasset deyib.

“Mən ABŞ-nin ticarət nümayəndəsindən hesabat aldım ki, 50-dən çox ölkə danışıqlara başlamaq üçün ABŞ Prezidenti Donald Trampla əlaqə saxlayıb və onlar bunu çoxlu tariflərlə üzləşdiklərini başa düşdükləri üçün edirlər”, ‒ deyə K.Hasset bildirib.

O həmçinin əlavə edib ki, Vaşinqton Moskvaya qarşı idxal rüsumları tətbiq etməyib, çünki Tramp bu məsələnin Rusiya-Ukrayna münaqişəsinin sülh yolu ilə həlli üzrə danışıqlara mane olmasını istəmir.

“Aydındır ki, Rusiya və Ukrayna ilə danışıqlar gedir və mən hesab edirəm ki, Donald Tramp bu iki məsələni qarışdırmamaq barədə qərar qəbul edib”, ‒ deyə o söyləyib.

Ağ Ev rəsmisi əlavə edib ki, Moskvaya qarşı tarifləri artırmaqdan imtina ABŞ-nin gələcəkdə Rusiyaya qarşı kökündən fərqli münasibət göstərəcəyi anlamına gəlmir.