Adı qalmaqala qarışan Umerovla bağlı diqqətçəkən açıqlama

Ukraynanın keçmiş müdafiə naziri Rüstəm Umerov Kiyevdə korrupsiya qalmaqalı fonunda danışıqlar üçün getdiyi iddia edilən İstanbuldan qayıtmaya bilər.

Bu barədə Ukrayna Ali Radasının deputatı Oleksiy Qonçarenko məlumat verib.

“Ən maraqlısı Umerovun İstanbuldan qayıdıb-qayıtmayacağıdır”, – o, teleqram kanalında yazıb.

Rüstəm Umerov noyabrın 11-də Rusiya və Ukrayna arasında əsir mübadiləsi ilə bağlı yeni görüşlər üçün İstanbulda olduğunu açıqlayıb. Tərəflərdən heç biri əvvəllər bu səfər və ya qarşıdakı danışıqlar barədə məlumat verməyib.

Məlumata görə, Umerovun adı elə həmin gün Ukrayna hökumətinin üzvləri ilə bağlı böyük korrupsiya qalmaqalı ilə əlaqədar hallanıb.

Ukrayna Milli Antikorrupsiya Bürosu (NABU) iş adamı Timur Mindıçın rəhbərlik etdiyi korrupsiya şəbəkəsinin təkcə enerji deyil, həm də müdafiə sektorunda fəaliyyət göstərə biləcəyini açıqlayıb. Prokuror Mindıçın müdafiə naziri olarkən Umerova “təsir göstərməklə” müdafiə sektoruna müdaxilə etdiyini iddia edib.

Noyabrın 10-da NABU və İxtisaslaşdırılmış Korrupsiyaya qarşı Mübarizə Prokurorluğu (SAP) energetika sektorunda iri korrupsiya sxemi ilə bağlı araşdırma elan edib. Axtarışlar “Enerqoatom”da, həmçinin keçmiş energetika naziri və bu gün istefaya göndərilmiş ədliyyə naziri German Qaluşenko və Mindıçın evlərində aparılıb.

Qurum cinayətkar qrupun fəaliyyətində indiki və keçmiş 4 nazirin əli olduğunu bildirib. Ukrayna mətbuatı xəbər verib ki, onlardan biri Qaluşenko olub. Noyabrın 11-də NABU keçmiş baş nazirin müavinini eyni işlə bağlı qanunsuz varlanmada ittiham edib. Yerli KİV-lər şübhəlinin keçmiş baş nazirin müavini və keçmiş milli birlik naziri Aleksey Çernışov olduğunu yazıb.