Afrikada müstəmləkə siyasətindən əl çəkməyən Makron hakimiyyəti

Tarixi hərbi cinayətlərlə dolub-daşan Fransa müstəmləkə siyasətindən bu gün də əl çəkmir. Hətta bu ölkənin 90-dan çox deputatı Prezident Makrona müraciət edərək Afrikadakı uğursuz siyasətlərindən narahatlıqlarını ifadə ediblər. Dolayısı ilə müstəmləkəyə, ölkələrin təbii sərvətlərini talamağa davam etməyə çağırış ediblər. Bu da Fransanın iqtidarlı-müxalifətli bütün siyasi sisteminin neokolonializm təfəkkürünü bir daha nümayiş etdirib.

Təbii ki, Fransanın insan haqlarından və demokratiyadan bəhs etməyə üzü yoxdur. Çünki rəsmi Paris sözügedən siyasəti ilə beynəlxalq hüququn fundamental prinsiplərinə xələl gətirib. Fransızlar başa düşməlidirlər ki, artıq orta əsrlər dövrü deyil və müasir dövrdə siyasi konyuktura fərqli şəkildə cərəyan edir. Deməli, başqa ölkələrin daxili işlərinə müdaxilə etmək yerinə demokratik prinsiplərə əməl etmək lazımdır.

Qeyd edək ki, əsrlərdir Fransanın müstəmləkə siyasətininin qurbanı olan Afrika ölkələri artıq buna qarşı açıq mübarizəyə keçib. Həmin ölkələrdə anti-Fransa əhval-ruhiyyəsi geniş vüsət alıb. Bu hal özünü Nigerdə daha aydın göstərir. Bir sözlə, “bumeranq effekti” müşahidə olunur. Çünki Fransa müstəmləkəsində olan ölkələrə faciədən başqa heç nə verməyib. Bu utancverici səhifənin bağlanması üçün isə dünya birliyi əlindən gələni etməyə borcludur.