Ağ Ev əlavə maliyyələşdirmə məsələsini nəzərdən keçirəcək

Ağ Ev administrasiyası İrana qarşı hərbi əməliyyatın davam etdirilməsi üçün əlavə vəsait tələbi ilə ABŞ Konqresinə müraciət etməyə ehtiyac olub-olmadığını təhlil etmək niyyətindədir.

Bu barədə Ağ Evin Milli İqtisadi Şurasının rəhbəri Kevin Hassett "CBS" telekanalının efirində çıxışı zamanı bildirib.

"Hesab edirəm ki, hazırda biz bütün zəruri vasitələrə sahibik. Düşünürəm ki, Ağ Evin İnzibati-Büdcə İdarəsi və onun rəhbəri Rassel Vout hərbi əməliyyatlarla əlaqədar Konqresə yenidən müraciət etməyimizin lazım olub-olmayacağı məsələsini araşdıracaqlar. Hər hansı əlavə resurslara ehtiyacımız olacağı dəqiq deyil", – deyə Kevin Hassett İran əməliyyatı üçün qanunvericilərdən əlavə ayırmaların istənilməsi ehtimalı ilə bağlı məsələni şərh edib.

Hassettin sözlərinə görə, ona ABŞ-nin İrana qarşı əməliyyat xərclərinin artıq təqribən 12 milyard dollar təşkil etdiyini bildiriblər. Bununla belə, o, bu xərclərin məhz hansı dövr ərzində çəkildiyini dəqiqləşdirməyib.