"Bu, görünməmiş hadisədir" - ABŞ və Aİ arasında xaosun əsas səbəbləri

ABŞ növbəti 10 il ərzində rüsumlardan 3 trilyon dollar gəlir əldə edəcək.

Bu barədə Ağ Evdəki Milli İqtisadi Şuranın rəhbəri Kevin Hassett məlumat verib.

“Konqresin Büdcə İdarəsi bildirib ki, növbəti 10 il ərzində rüsumlardan əldə edilən gəlir 3 trilyon dollar təşkil edəcək. Bu, büdcə kəsirinin azaldılmasına və sosial təminat proqramının sabitliyinə xidmət edəcək”, – deyə K.Hassett bildirib.

O, ABŞ Prezidenti Donald Trampın kifayət qədər yaxşı hesab etdiyi ticarət razılaşmasına nail olunmasa, bu rüsumların real olacağını deyib.

D.Tramp isə ABŞ-nin keçən ay rüsumlardan 25 milyard dollar gəlir əldə etdiyini açıqlayıb. O, jurnalistlərə “əvvəllər görmədiyimiz səviyyədə rüsumlar gəlir. Bu, hələ başlanğıcdır” deyib.

Qeyd edək ki, iyulun 12-də D.Tramp avqustun 1-dən Avropa İttifaqı mallarına 30 %-lik rüsumların tətbiq olunacağını açıqlayıb. Macarıstanın xarici işlər naziri tariflərin tətbiq edilməsində Avropa Komissiyasının rəhbəri Ursula fon der Lyayeni günahlandırıb. Öz növbəsində Ursula fon der Lyayen ABŞ-ni əks tədbirlərlə hədələyib. Avropa Birliyinin ticarət komissarı Maros Şefçoviç isə jurnalistlərə açıqlamasında Avropa Birliyinin son dərəcə səbir nümayiş etdirdiyini deyib.