Ağ Ev və Kreml qarşılıqlı bəyanat yaydı

"Ağ Ev Venesuela neftinin yalnız ABŞ qanunvericiliyi və milli təhlükəsizliyinə uyğun gələn daşımalarına icazə verəcək".

Bu barədə Ağ Evin aparat rəhbərinin müavini Stiven Miller bəyan edib.

Miller bu fikri Pentaqon rəhbəri Pit Heqsetin ABŞ-nin Venesuela neftinin daşınması üçün nəzərdə tutulan gəmilərə blokadanı davam etdirəcəyi barədə paylaşımını şərh edərkən bildirib.

O əlavə edib ki, Venesuela enerji sektoru ABŞ tərəfindən müəyyən edilmiş qanuni və sanksiyalaşdırılmış kommersiya kanalları vasitəsilə "məhdudiyyətsiz iqtisadi potensiala" malikdir. Bu bəyanata qarşı Rusiyadan verilən cavab özünü gözlətməyib.

"ABŞ saxlanılan "Marinera" adlı gəmidə olan rusiyalıların tezliklə vətənə qayıtmasına mane olmamalıdır". Bu barədə Rusiya Xarici İşlər Nazirliyi bəyan yayıb.

"Ekipaj üzvləri arasında Rusiya vətəndaşlarının olması ilə bağlı məlumatları nəzərə alaraq, ABŞ tərəfinin onlara humanist və ləyaqətli münasibət göstərməsini, hüquq və maraqlarına riayət etməsini, həmçinin tezliklə vətənə qayıtmalarına mane olmamasını tələb edirik", – deyə qurumdan bildirilib.

Qeyd olunub ki, rəsmi Moskva ABŞ hərbçilərinin Rusiya bayrağı altında üzən "Marinera" gəmisini ələ keçirməsi ilə bağlı məlumatları diqqətlə izləyir.