Ağ Ev yanıldıcı və qərəzli xəbərləri dərc edən KİV-ləri belə ifşa edəcək

ABŞ Prezident administrasiyası rəsmi saytda “Media Offender of the Week” (“Həftənin media təqsirkarı”) adlı yeni bölmə istifadəyə verib. Bölmənin məqsədi Ağ Evə görə “yanıldıcı və qərəzli” xəbərləri dərc edən KİV-ləri ictimai şəkildə göstərməkdir.

Bu barədə “Newsweek” nəşri məlumat yayıb.

Qeyd edilən bölmədə CNN, MSNBC, “The Washington Post”, “CBS News” kimi aparıcı media qurumlarının yer aldığı “Utanc zalı” (“Hall of Shame”) yaradılıb.

Ağ Evin mətbuat katibi Kerolayn Livitt açıqlayıb ki, platformada “yalan”, “qərəz”, “jurnalistikanın yanlışlığı” və “solçu çılğınlıq” kimi kateqoriyalara bölünən nümunələr toplanacaq. Bu addım Prezident Donald Trampın əsas media qurumlarını “fake news” adlandırması ilə tanınan uzunmüddətli kampaniyasının ilk dəfə rəsmi səviyyəyə daşınması kimi qiymətləndirilir.

Sahənin təqdimatı D.Trampın jurnalistlərlə sərt davranışları fonunda gəlib. Xüsusilə 14 noyabrda “Bloomberg” müxbirini “sakit ol, donuz” sözləri ilə susdurması böyük rezonans doğurmuşdu.

Media azadlığı və Ağ Ev – mətbuat münasibətlərinin gələcəyi ilə bağlı narahatlıqlar artır.

Sayt bu həftə D.Trampın qanunsuz əmrə tabe olmamağa çağıran altı demokrat siyasətçiyə yönəlmiş reaksiyasının mediada yanlış təqdim olunduğunu iddia edir.

D.Tramp “Truth Social” paylaşımında onları “SEDITION – ölüm cəzası ilə cəzalandırılır” ifadəsi ilə tənqid etmiş, daha sonra “HANG THEM” yazılan şərhi repost etmişdi. Media bunu “edam çağırışı” kimi təqdim edib.

Ağ Ev isə bildirir Prezident D.Tramp heç vaxt qanunsuz əmr verməyib. O, orduda üsyanı təşviq etməyin məsuliyyətə cəlb edilməsini tələb edib.

Saytda “müntəzəm pozucular” kimi göstərilən KİV-lər siyahısında “The New York Times”, “Axios”, “Politico”, “ABC News”, “The Hill”, “The Associated Press”, “The Wall Street Journal” yer alır.