Ağ Evdən təəccübləndirən göstəriş | İranla bağlı bu addımda əsl məqsəd nədir?

Ağ Ev İrana qarşı yeni sanksiyaların tətbiq edilməməsi barədə göstəriş verib.

“The Wall Street Journal” öz mənbələrinə istinadən məlumat yayıb ki, Ağ Evin mətbuat katibi Karolin Livitt Dövlət Departamentinə, Xəzinədarlıq Departamentinə və Milli Təhlükəsizlik Şurasına İrana qarşı yeni sanksiyalar tətbiq etmək üçün bütün səyləri dayandırmağı tələb edən direktiv göndərib.

Nəticədə, ABŞ Prezidenti Donald Trampın İrana maksimum təzyiq göstərmək kampaniyası həyata keçirilmir. K.Livittin müavini Anna Kelli də bu məlumatı birbaşa təkzib etməyib, lakin sanksiyalarla bağlı istənilən yeni qərarın ya Ağ Ev, ya da müvafiq departamentlər tərəfindən elan ediləcəyini bildirib.

Qəzet qeyd edib ki, Vaşinqton sonuncu dəfə mayın 21-də Tehrana qarşı məhdudiyyətlər tətbiq edib, o vaxtdan bəri Maliyyə Nazirliyi yeni sanksiyaların elanını ən azı iki dəfə təxirə salıb.

Bununla belə, neft satışı və dondurulmuş İran aktivləri ilə bağlı əsas məhdudiyyətlərin qüvvədə qalacağı gözlənilir. Bəzi rəsmilər hesab edirlər ki, bu yanaşmanın məqsədi İranın nüvə proqramı ilə bağlı danışıqlar fonunda gələcək məhdudiyyətləri diqqətlə nəzərdən keçirməkdir.